Un novu prugramma scentificu associa i prufeziunali di u mare è l’Università di Corsica / CNRS. U scopu : ghjunghje à una gestione à longu andà è « ragiunevule » di a pesca.
Cumu assicurà una sfruttera di a risorza marina è u mantenimentu di un mudellu di sviluppu ecunomicu arrimbatu à l’attività di a pesca ? Eccu, in corte parolle, l’imbusca di u prugettu. Dapoi u mese di ghjugnu di u 2017, un prugramma di ricerca, finanziatu nant’à i fondi cumunitarii di u Feder 2014-2020, associa di manera stretta l’Università di Corsica, u CNRS, l’uffiziu di l’ambiente di a Corsica (OEC), a stazione STARESO è i prufeziunali di u mare da risponde ci. U so nome ? Moonfish. Daretu à st’acronimu inglese, s’appronta un arnese di mudelisazione per a gestione durevule di e risorze marine in Corsica. U scopu : prupone strategie di pesca chì rispettanu l’ambiu da mantene o da risturà e pruviste à un livellu chì permette d’assicurà a durabilità di a pruduzzione. U metudu ? « Si tratta nanzituttu d’acquistà e cunniscenze e più larghe pussibule nant’à l’ambiu è e spezie per pruvà di cuncipisce un mudellu di gestione di e risorze chì sia specificu à a Corsica, creendu arnesi d’aiutu à a decisione per i pescadori », spieca Paul-Antoine Bisgambiglia. Maestru di cunferenze in infurmatica, stu circadore di u laboratoriu Scenze per l’Ambiante (CNRS / Università di Corsica) mette in ballu u prugettu Moonfish à fiancu à Eric Durieux, biolugistu è maestru di cunferenze in eculugia marina, per sapè ne di più nant’à u statu è l’evuluzione di a risorza marina per stu liturale corsu, in u filu di i studii messi in ballu nant’à a piattaforma STELLA MARE (Università di Corsica / CNRS).
Per quessa, a decina di circadori impegnata in u prugettu, chì associa biulugisti, fisiziani è infurmatiziani di u laboratoriu Scenze per l’Ambiante (CNRS / Università di Corsica) s’arremba soprattuttu à i scambii cù i pescadori corsi, per via di u so cumitatu regiunale (CRPMEM) è di e quattru prudomie. Un acquistu tamantu per i scentifichi : in fatti, li portanu i prufeziunali di u mare una cunniscenza di l’ambiu è un sapè fà chì permette à i cercadori di sfruttà i dati i più larghi pussibuli, in leia cù a realità di u terrenu, da pruvà di definisce una gestione durevule.
Tandu, sò messe in ballu inchieste sopra locu in giru à i pescadori ma dinù per via di quistiunarii precisi fatti per allargà e cunniscenze. In u cuntestu di una prufessione chì strazieghja à rinnuvellà si, accresce u sapè empiricu di i prufeziunali di a pesca hè dinù unu di i scopi di Moonfish da cuntribuisce à u so sviluppu. Pescadori chì vedenu dinù a scenza cum’è un mezu di perennizà a so attività. Nant’à circa 190 spezie piscate in u Mediterraniu, i travagli di l’Università di Corsica riguardanu in particulare una decina di « spezie d’interessu » frà e più lucrative : denti, cernia, tonnu, spadone, ligusta, zinzi… « In un sicondu tempu, unu di i scopi di u prugramma hè di stabilisce un mudellu per permette di fà previsione da cuntribuisce à a pruposta d’una pulitica di a pesca, prevede Paul-Antoine Bisgambiglia. Si puderia trattà di priservà e pruviste di certe spezie nant’à certi periudi o di prutege zone per l’interessu di a risorza, pigliendu in contu a situazione di u mercatu ».
D’altronde, s’impegna Moonfish per ogni locu di u liturale isulanu. Da accresce e so cunniscenze, l’attori di u prugettu sulliciteghjanu i partenarii impegnati in a dimarchja. L’uffiziu di l’ambiente di a Corsica, chì gestisce a riserva naturale di e Bocche di Bunifaziu, si tene per un dettu 25 anni di dati censi in quantu à l’evuluzione di e pruviste marine per stu situ chì ferma un puntellu di a pesca isulana. « Mettimu à dispusizione di u prugramma l’inseme di i dati racolti nant’à a riserva naturale di Bunifaziu dapoi u 1992 da alimentà quant’è pussibule u prugettu di mudelisazione, face sapè Marie-Catherine Santoni, assistante scentifica in carica di u seguitu di e pruviste marine à l’OEC. Permette soprattuttu di mette in risaltu l’effettu di a gestione di l’aghje marine prutette nant’à a rentabilità è a pruduzzione di a pesca artisgianale chì ponu duppià è ancu di più per certe spezie sposte à e mani di pescadori recreativi ».
Palesa quant’ellu serebbe incumplettu u prugramma s’ellu ùn pigliava in contu solu a pesca prufeziunale. « A pesca recreativa hè una parte chì hà dinù a so impurtanza è per a quale sò pochi i dati dispunibuli in Corsica da pudè la apprezzà di manera precisa, seguiteghja Marie-Catherine Santoni. In Bunifaziu, ne avemu dapoi u 2006, ciò chì ci permette di valutà i prelevamenti ricacciati da st’attività, per un dettu trattendu si di u denti ch’è no seguitemu dapoi parechji anni. Circhemu à valurizà e sperienze acquiste, à ammaestrà i dati di a pesca à u livellu lucale è à travaglià cù l’Università di Corsica per studià li di manera scentifica, è publicà ste sperienze à u livellu internaziunale. U scopu generale hè di sustene quant’ellu si pò a pesca artisgianale corsa ».
D’altronde, stu studiu nant’à u denti hè statu apprufunditu mentre i travagli di tesa di Michel Marengo à l’Università di Corsica / CNRS, sott’à a direzzione di Eric Durieux. Oramai, si trova Michel Marengo in un cuntrattu di post dutturatu in a stazione STARESO cù i finanziamenti di u prugettu Moonfish : « a mo missione hè di trattà i dati di a basa STARESO è di purtà a mo sperienza nant’à a racolta è a sfruttera di dati biulogichi acquiste mentre e stonde passate in mare da seguità e spezie marine ». Cù un’imbusca chjara : ghjunghje à un mudellu di pesca durevule chì hè a scumessa maiò di a dimarchja, è soprattuttu u mezu da mantene un’attività ecunomica cù a scenza oramai à fiancu à ella.
*Stazione di Ricerche di sottu mare è oceanugrafiche.